Balajar dari Apa yang Kotong Alami Saban Hari

Balajar dari Apa yang Kotong Alami Saban Hari

Bacaan: Ulangan 6 : 1-9

Basodara sayang dong. Tren pake kalung salip sakarang di banya tampa su makin jadi hebat, bukan hanya di ana muda dong sa ma ju su sampe orang tua dong ju. Mau pake rante salip dari kayu ko mas ko perak ko samua ada. Banyak ju orang yang jual itu salip. Orang Kristen kalo pake ni, bangga talalu.. di leher, di tangan, ko itu jadi barang yang hias di badan. Sonde sala ju katong hias kotong pung rumah ju dengan hiasan bentuk salip, atau gambar-gambar simbol gereja yang laenyang menarik deng bekin orang yang maso kotong pung rumah langsung tau kalo kotong ni Kristen. Kotong pake deng kotong jaga satenga mati. Ada viral sekarang so’al hinaan pi salip deng pake kata “jin kafir” yang bikin orang Kristen nae darah. Orang yang sonde tau gareja ju iko jengkel deng marah, emosi maladak. Hmmm.. Sonde parna sambayang di Tuhan Yesus ma bagitu orang hina salip deng Yesus dia dahulu mara duluan. Aneh ma nyata, wuang? Yang lebih wow lai, orang Kristen sekarang su tren bardo’a di FB. Tuhan beta mau pi sakolah ni jaga beta ko beta pung kelu ju Tuhan Yesus jaa ee. Ju orang dong komen bilang: Amin. Ini kasih kepada Tuhan Yesus ko hanya sekedar latah deng keada’an sa.

Basodara sayang dong. Orang Isra’el waktu kaluar dari tana Masir, dong alami banya-banya hal ko jadi pengalaman iman sehari-hari dong dengan Tuhan Allah. Dong rasa, karmana Tuhan pung rasa sayang deng Tuhan pung rasa adil yang Dia ajar tarus-tarus pi dong. Waktu ba’i Musa yang antar kaluar dong dari tana Mesir su mati, andia Yosua karja ko ganti ba’i Musa. Kasi Tuhan Allah talalu panting ko terus ulang-ulang itu Tuhan pung Kata-kata kasi orang muda berikut dong andia generasi Isra’el turun temurun. Itu ko Isra’el sonde parna lupa Tuhan Allah deng biar Tuhan Allah deng orang Isra’el sonde tapisa.

Nah, basodara sayang dong. Tuhan Allah sonde mau kalo bangsa Isra’el tu hanya pelihara Tuhan Allah pung parenta sekedar jadi barang hias sa. Tuhan Allah piung mau tu itu parenta batul-batul dong paham ko mangarti deng simpan dalam dong pung hati ko nanti kasi lanjut di dong pung ana-ana dong di masa depan. Tuhan Allah mau ko dong pung sayang pi Tuhan Allah tu bukan sama ke satu barang yang musti kena pili ko sonde musti pili, ma musti sebagai satu parenta yang wajib hukumnya bagi Isra’el. Tagal hanya deng cara bagitu, dong bisa jadi satu deng Tuhan Allah yang kudus. Tuhan Allah mau ko kotong jang hanya bangga ko bagaya jadi orang Kristen, ma kotong musti ukur kotong pung idop ni su batul-batul di dalam Tuhan Allah pung tangan ko di luar. Kotong Tuhan Allah pake ko kotong yang pake Tuhan Allah, katong pung nama, kotong pung bagaya. Sama ke kata orang: jang sampe kulit gaga ma isi kosong. Ko sama ke petani dong bilang : padi kotong liat kulit mulus ma isi sonde ada.

Tuhan mau jang kesing sa yang gaga. Tuhan mau persekutuan yang intim deng Dia yang jadi prioritas utama. Na, ini mulai dari orang tua yang kenal Tuhan, mengerti Tuhan Allah pung rasa sayang, idop di itu rasa sayang deng praktek itu rasa sayang. Ajar kasi ana dong ko biar dong tau jalan mana yang batul deng lurus. atau katong jadi sama ke anak panah penunjuk jalan di persimpangan jalan yang kasi tunjuk kalo itu jalan menuju kasih, damai, selamat, Yesus, suruh katong pung ana pi tapi katong tenga di tempat. Di sini ju kotong nanti omong so’al komitmen deng kesetia’an yang total. Sonde bosan, sekalipun omong ulang-ulang, kasi inga ulang-ulang, jang bosan.

Ada beberapa bagian jadi conto (metafora) ko ajar Tuhan pung Kata-Kata. Hanya sa, dulu ayat ini kemudian dilakukan talalu harfiah. Dong mulai untuk bungkus tali kulit di dong pung tangan kiri dengan satu kotak kecil (tefillin) yang di dalam ada isi Kitab Suci yang pili ame dari Taurat. Itu kotak yang sama ju yang dong ikat di kapala bagian testa. Dia pung nama “Phylactery” dia [ung maksut “tali sambayang” (Baca. Ul 11:18 deng Mat 23:5). Sayangnya, orang Yahudi saparu su talanjur mangarti ini parenta hanya secara hurufiah sa. Dong benar-benar taro kutipan Tuhan pung Kata-kata di testa, lengan, pintu rumah dan pintu gerbang. Tindakan bagini di dia pung diri sandiri memang sonde salah. Ma, kalau bagini sonde mangarti ko bekin iko batul-batul, itu samua hanya akan jadi simbol yang sonde ada pung arti apa-apa. Sama ke tadi, pake kalung salip ma hobi pajak doi di oto, di rumah pasang samua gambar rohani ma kawin cere jadi tren.

Basodara sayang dong. Tuhan Allah ajar dong deng kotong pake simbol-simbol ko gampang ingaa deng gampang buat. Simbol tu jadi tanda yang bawa kotong pi idop saban hari yang botong dapa liat, rasa, raba, deng dengar. Jadi kalo kotong ajar anak-anak dengan kata, deng simbol deng jang lupa ju deng conto, teladan. Karena anak-anak sonde dengar katong pung perintah, dong meniru katong pung perbuatan. Jadi katong ajar bae tapi katong buat sonde bae ju sonde mempan kasi dong.

Na coba kotong amati bae-bae simbol yang Tuhan Allah pake di sini, di Tuhan pung Kata-Kata: Ana orang Yahudi su kenal hal-hal yang ada muatan rasa parcaya waktu dong masi mea’-mea’. Kenapa? Tagal ana mea’ lak-laki dapat sunat di hari ke-8. Pada perayaan-perayaan tertentu sama ke itu ana pung bapa pimmpin do’a deng terangkan arti di itu ritual. Biar itu anak dong sonde mangarti, ma tagal itu dong pung biasa, jadi parlu ko kotong bekin. Waktu ana-ana besar nanti, dong akan mangarti, arti di balik tiap simbol dong. Artinya, bapa tau duluan baru bisa ajar di ana. Sonde bisa, bapa suru anak pi gareja ma bapa sonde pi gareja. Bapa papoko ana ko jang minum sopi ma bapa minum sopi sampe mabok. Sonde bisa.

Yang berikut, taro firman TUHAN di tampa-tampa tertentu (tangan, testa, pintu ruma, deng pintu gerbang) sebenarnya mau kasitau kotong akan otoritas dari Tuhan pung Kata-Kata yang ada di wilaya-wilaya itu. Bukan sekadar barang hias (ornamen) yang ada kesan mistis. Bukan ju dekorasi yang kasi kesan inda sa. Ini tentang pengakuan terhadap otoritas dari Tuhan pung Kata-Kata di tiap orang pung idop. Jadi, kata “tangan” itu omong so’al tindakan. Kotong banya karja deng pake tangan. Artinya, apapun yang kotong bekin musti kasi tunju botong pung rasa sayang pi Tuhan. yang benar dia pung hasil andia orang kalam. Kitab suci ajar orang ko bisa punya budi pekerti. Kalo kata “dahi ko testa” sebenarnya kurang begitu tepat. Orang pake kata Ibrani lebih tunju di area di antara dua mata. Ini berbicara tentang cara pandang. Bukan hanya apa yang bole liat, ma karmana kotong liat satu hal. Karmana, bukan sekadar apa.

Taro Tuhan pung Kata-Kata di pintu ruma deng pintu gerbang ko kasi tanda di kotong satu hal yang su bageser dari wilaya pribadi (tindakan dan penilaian) ke wilaya sosial (relasi dengan komunitas). Spiritualitas pribadi sonde akan pernah barenti di kotong pung diri sandiri. Kotong sayang Tuhan ju bukan artinya kotong idop di luar dunia. Malah sebaliknya kalo kotong bilang kotong pung kualitas rohani bae andia kotong musti bisa kasi tunju itu rasa sayang. Kasi tunju botong pung diri pung kualitas pi orang laen. Sebagai orang percaya, nilai-nilai dari Tuhan pung Kata-kata musti kotong junjung di ini idop saban hari. Bukan sembarang moralitas.

Na basodara sayang dong. Ini yang ahir beta mau tulis (omong) so’al pintu gerbang. Orang Yahudi dong pung pintu gerbang tu, jadi tampa bakumpu kasi pamimpin dong. Para tua-tua dong biasa ame keputusan-keputusan panting di itu tampa. Jadi, kalo Tuhan Allah suru taro di pintu gerbang, itu mau kasitau kotong ko jang parna lupa akui otoritas dari Tuhan pung Kata-kata yang ada di tiap keputusan yang botong mau bekin. Tuhan talalu bae e, Dia mau bekin barisi kotong ko bisa idop deng Dia. Tuhan Allah sonde parna bekin kotong jadi anak-anak gampang. Kenapa? Biar kotong jadi layak dapa makota. Tagal itu tiap orang parcaya, tua, muda, kici-besar, ingat ko idop deng Tuhan pung Kata-Kata ko ba’akar di situ. Bukan pi ba’akar di kotong pung hebat, ko pintar talalu.

Bagitu sa. Soli Deo Gloria. Amin

Penulis: Pdt. Yulita Y. Lero
Editor: Heronimus Bani