Ho Mfee Saa’ he Tafena’ Yesus Kristus In Umi nbi Pah-Pinan?

Suur So’it: 1Korintus 3:9b-23 (Amrees ma msoo’i mbi Suur Akninu’ re’ ntui je npaek Uab Amarasi)

 

Aok-bian manekat anbi Yesus Kristus hit Usi’. Anbi fuun Fanu’ re’ ia, abitan Koro’oto namnau neno re’ ahuunt ein nahake’ krei nbi sin kuan. Neno re’ sin npaek je he njair Neon Mahonit ai’ Neno re’ Krei ji nhake nbi bare naan es re’, fuun Fanu’ ntaam neno mese’, nbi toon bo’ tenu mmese’ (1 Agustus 1931). Amneon ii, abitan Koro’oto re’ antoup noni’ ma rasi krei ji es toon nifu mese’ mnatun seo mbo’ es am niim (1915). Mes ka matu’i fa. Anbi 1 Agustus 1931 on nai te nak, nmui’ surat noo’ goes re’ ntui aam Thimotius Sae’besi’ in kanan. Surat re’ ia njair tanar neu abitan Koro’oto nak, krei ji nhake nbi bare naan.

Fuun Fanu’ re’ ia, abitan Koro’oto nasaeb ein sukur ma makasi neu Uisneno, natuin In pafa’ ma panaf, In aifan ma In askaun, In tukus In nenut, es re’ nok sin ntea oras ia. Anmui’ tuaf ahunut re’ namneuk ma namsaab, sin kaank ein bian namnau sin fe’, bian anmoeh ein, bian namnekun nfiin. Amuint ein re’ neno ia nhaken ma nasaeb ein sukur ma makasi, ro amanoet, ahinet, akuran-rabu’, apehet, amakoet, feef mapipi’, feef a’temef, ‘niim reko, ‘niim akbabi’, hae reko ma hae hera’, ma rasi mfaun et sin arsin mese’-mese’.

Maski onan re’ naan, mes sin nreer nekan ma nbua nekan. Sin nneek mesen ma nasaeb ein sukur ma makasi neu Uisneno. Sin nhuum a’moen ma nkumanin. Sin nfee sin haek ein ma ‘niimk ein, sin teenb ein ma neunk ein neu rasi krei ji nbi oras sin nasaeb ein sukur ma makasi. Rasi naan anjair tanar nak, sin namnau Uisneno In manekan. Onaim karu sin namnau In manekan, sin he nfeen saa’ neu Uisneno he njair tanar nak sin nafena’ Yesus Kristus In Umi nbi pah-pinan ia?

Yesus Kristus In umi, huma’ mee es re’ he tafeen ee nbi pah-pinan ia?
Karu on naan ate, haan tanas-haan totis neu kit ma neu abitan Koro’oto. Hit he tfee saa’ he tafena’ Yesus Kristus In Umi nbi Pah-pinan ia? Karu tataan abitan Koro’oto te hit he tak, sin he nfeen saa’ he sin nafena’ Yesus Kristus In Umi nbi Pah-pinan ia, baineis-nesi’ nbi kuan Koro’oto?

Yesus Kristus In haef nai’ Paulus namnaub abitan Korintus nak, “Hi re’ naan on re’ uim jes!” Rasi ia ntoom kit, ntoom abitan Koro’oto msa’. Hit on re’ uim jes. Sin on re’ uim jes. Karu on naan ate, hi ai’ hit ai’ sin he nfeen saa’ he nafena’ umi naan?

Nai’ Paulus namnaub amsa’ nak, “Hi re’ naan on re’ uim onen es!” Rasi ia ntoom kit, ntoom abitan Koro’oto msa’. Hit on re’ uim onen es. Sin on re’ uim onen es. Karu on naan ate, hi ai’ hit, ai’ sin he nfeen saa’ he nafena’ uim onen naan?

Mtae suur so’it ma resat akninu’ re’ nai’ Paulus antui ma nsoun ee neu abitan Korintus. Surat re’ ansoun ee nahuun, ‘bata teun era’ 9b – 23. Anbi naan hi of mihiin ma mikeo rasin naan.

 

Tebes namneo anbi Yesus Kristus Faut Putuk Amneot ma Kninu’.

 

Atuis: Pnt. Heronimus Bani