Botong parlu kaya ko?

Botong parlu kaya ko?

Basodara sayang dong. Coba baca Pengkhotbah 5 : 7 – 16. Beta baca ais beta ada mau tulis ulang sa ini renungan. Ini renungan su parna ada di SnaK. Beta kutip ulang ko taro di sini. Barang lama yang beta coba poles ko baru. Dia pung isi, refleksi, renungan pake dasar Tuhan pung Kata-Kata jadi beta sonde ubah.

Basodara sayang dong. Sapa yang sonde mau kaya? Samua orang karja karas siang-malam ko kalo bisa, bisa kaya. Kaya itu orang liat dari orang pung tampilan. Kalo dia pung badan di talinga, leher, jari dong ponu barang mas, itu ada tanda-tanda kalo itu orang kaya. Dia bukan sekedar bagaya, dia ju ada kaya. Ini baru satu conto kici sa. Ada yang lebe lai, andia sama ke, kalo dia pung oto satu ko dua ko, trus itu oto dong beli pake doi yang itong taro di karong mungkin. Orang sonde pake doi tunai. Pi bank ko pinda buku sa. Orang yang doi banya tu, andia orang kaya su. Ma tantu sa, ada sama ke kriteria, wuang? Na, pokoknya kalo ada yang baca ini tulisan, trus ada dudu pikir-pikir, orang kaya tu yang karmana? Na, biasa botong pung pikir yang begitu-begitu dong, kalo sonde ada pikir yang kurang bae-bae sa deng itu orang yang kaya dong. Andia sama ke dong pung sifat. Kadang bisa mara orang bagini, “lu sangka ini harta dong dapa gampang, na!” Na, beta ju harap yang beta tulis ini sonde talalu lebe-lebe.

Ma andia, basodara dong. Inga, orang kaya dong tidor sonde sonu. Dong pikir ini harta dong jang sampe ini malam ada yang datang ko ru’i ame saparu. Andia ko dong pung ruma dong pagar kaliling. Kalo perlu pake anjing herder ko jaga. Pake pos jaga di situ yang taro orang baganti pagi sampe sore, ada lai yang sore pi malam sampe pagi lai. Deng bagitu baru orang kaya dapa tidor sonu. Ma ada ju orang kaya yang sonde bagaya talalu. Dong malah bagi-bagi dong harta kasi orang miskin, pake cara, bangun yayasan sosial. Kasi kerja orang di yayasan, bayar dong pung gaji ko dong urus dong pung sumbangan kasi orang miskin. Dia pung istilah keren bilang, pemberdayaan.

Basodara dong. Kalo botong baca Pengkhotbah yang tadi beta tunjuk, dia bilang, harta kekayaan tu, samua sia-sia, sonde ada pung guna. Pasti orang kaya dong baca abis dong jengkel deng kakodok. Orang su karja karas banting tulang siang-malam, karingat malele dara baru jadi dapa itu harta dong, trus Pengkhotbah bilang, sia-sia.

Bisa jadi batul. Ma andia, mesti botong mangarti bagini. Biar ada harta ko tamba-tamba kaya sama ke Bill Gates, Jack Ma, ko sapa  orang kaya di Indonesia sama Prajogo Pangestu ko, Keluarga Eka Tjipta Widjaja, dong pung harta dong orang bisa itong. Kabar bae dari dong andia, dong makin kaya, ma, sonde bagaya talalu. Dong pake dong pung harta ko bangun usaha, kasi karja orang, bayar dong pung capek ko bisa urus dong pung ruma tangga, kasi sakola orang miskin dong pung ana-ana dong, deng banya hal laen lai. Itu harta bagitu dong yang ada guna, sonde sia-sia.

Ma, samua yang sonde sia-sia bagitu, ahirnya, jadi sia-sia ju, tagal waktu “pulang” sonde bawa bam-banya. Hanya bawa diri. Bawa persembahan diri pi Tuhan yang pange pulang. Sonde pi sampe sana trus kastau Baptua bilang, “di dunia beta paling kaya!” Mau bagaya bagitu? Sonde mungkin.

Baptua minta yang kaya harta bisa pake ko babantu yang laen. Itu bae. Ma tantu mesti ada ju yang namanya kaya dalam sifat, sikap, yang jadi conto kasi orang laen waktu botong ada idop sama-sama di dunia. Botong inga itu Mateos 5 tentang ucapan bahagia. Beta coba kutip yang pake Bahasa Melayu Kupang. Beta kutip Mateos 5: 5-7

Orang kici dong ontong, tagal nanti dong tarima samua berkat yang Tuhan Allah su janji.

Orang yang talalu rindu sang Tuhan Allah dong ontong, tagal nanti Dia bekin puas sang dong.

Orang yang kasi tunju rasa kasian dong ontong, tagal nanti Tuhan Allah ju jato kasian sang dong.

Na, bagitu su botong pung renungan pende, pake Bahasa Melayu Kupang.

 

Penulis: Heronimus Bani