Tunggu Sabantar sa

TUNGGU SABANTAR SA

 

Pdt. KolmaleiKol Manimabi, S.Th

Ada banya hal yang kurang bae yang biasa beta bekin. Inia da satu hal yang paleng puruk di beta pung idop tu waktu beta sonde langsung kerja ko bekin beres apa yang mestinya beta bekin. Saban kali tu beta bekin bagitu. Padahal, beta tau kalo jarum jam yang ada tempel di dinding tu terus babunyi.  Kadang babunyi besar. Kalo su jam tuju pagi na, dia babunyi tuju kali. Bukan hanya itu sa, kalender ju su ganti. Gambar presiden ju beta su ganti. Pakian sakola yang dulu mera-puti, su ganti ju deng yang warna puti-abu. Deng satu yang lebe para lai tu, andia puti abu- ju su ganti deng baju itam panjang ke daster ko beta pung mama, bapa, kaka adi dong menangis makarereu’ tagal beta pake itu baju. Ma sama sa beta pung satu hal yang paling puruk tu, beta bein tarus.

Na, tau itu apa? Sabantar sa. Botong biasa bilang tunda sabantar do. Banya hal beta bilang sabantar sa, sabantar do, ko sabantar sa ee. Ma itu su, gara-gara bilang sabantar sa tu, yang sakarang beta su tambah tua ni. Beta mau ulang bekin yang itu barang dong, ma itu su liwat samua.

Ma satu hal yang paleng bae di beta pung idop ni, andia itu tu, waktu beta su mulai capek karja banya hal, ma ini kali beta bekin, beta karja sa. Ini pagi beta karja yang mestinya bulan lalu pung karja. Sore sabantar, beta mau karja yang mestinya beta karja minggu lalu pung, deng talalu sial ee, kawan. Su malam ni, tau-tau itu samua su sonde pake lai.

Jadi besok pagi lai beta mau mulai lai ke biasa deng: Tunggu Do Sabantar Sa.

Na, Tuhan Allah ada kasi inga di Amsal 18 : 9; orang yang bermalas-malas dalam pekerjaannya, sudah menjadi saudara dari si perusak.

Papagi hari di Awal Maret, Bikoen_Menifo