Menjadi Alat di Tangan Tuhan, Atjair baer es anbi Uisneno In A’niman

Oras sin n’oen ein on naan ate, umi re’ sin nabuan anbi naan, na’hasu’, ma sin arsin annaben Uisneno In Asmaan Akninu’ antaam neu sin. Rarit sin npoin ma natoon Uisneno In Rais Reko nok maat-maat (Haef ein sin Reta’/KPR 4 :31)

Atoin’ Amrasis, arenet, onaim in ro he nmui’ benar. Benas noon es ansoi’ je ntaam tuaf es. Karu antaen nasi, rarit annaak nasi naan batis-batis on re’ batis bo’ nua te, naan benas bo’ nua. Benas naan anjair baer es anbi tuaf es in a’niman he nmeup. Karu benas naan anfoon ee tar na’aik, rarit an’oetn ee neon goes, maans ee nmaeb on naan ate, an foon antein’ ee, rarit nataap nafain’ ee nbi in tapan. Benas naan mapanat nok reko. Kais tuaf es nait je he nseken ma n’oetn ee tafi’-tafi’ ai’ rafu’-rafu’.

Oras Uisneno nsonu’ Asiat-Anabit es re’ Asmaan Akninu’, In nabarab In atoup noin ein anjarin haef. Haef naan nahuum on re’ baer es anbi Uisneno In a’niman. Nahuum on re’ benas. In foon sin na’aikan. In nfeen sin a’be’if ma ma’tanif. Mes mansian ii ka of fa benas, mansian ii ro masnaaf, ma masmanaf. Onaim in ro he na’ruri’ ma na’bees neu Anesit, es re’ Uisneno. Oras mannsian ii na’ruri’ ma na’bees neu Uisneno, In ro he nnona’ ma nfee nain in snasan ma smanan. Kain anfee je nok neek abatas, neek a’oret. In ro he nnona’ ma nfee je nok neek akbubu’ ma kninu’. Reko nneis in nfee je ‘teme-‘teme nok nain in aon pasun nahuuum on re’ fua-”turu’ neu Uisneno.

Nai’ Petrus nok in partei ngguin anmo’en on re’ naan. Es naan ate, umi re’ sin nabuan ma n’oen ein naan, na’hasu’. Naan anjair tanar nak, Uisneno nkoen On neem nabua nok sin. Onaim Uisneno nait ma nanaib sin nahuum on re’ baer es anbi Uisneno In a’niman. Nai’ Petrus ka namtau ntein’ fa goen. In partei ngguin amsa’ ka na’koor ein fa goen. Sin npoin ma nnao natoon, nabeno’ ma nasina’ Usif Yesus In Rais Reok gui nok maat-maat. Sin nabranin batuur-batuur. Sin es-es ate on re’ been aikan re’ an’oet hau noon es ate, reka’ ntaikoib ma na’noin fe’ ete, na’ sin nkonon ai’ ntebi nfanin. Sin ro he niis ma n’iis naan mansian amre’ut na’ko sanat ma penu sin. 

Hit arkit tamnau oras ia hit tamtau. Hit tamtau neu saa’ re’ hit ka tiit ee fa, re’ anteek ee te nak, corona virus. Hit ta’koro’ he taniin jok ta’ko menas naan he kais anmoman kit. Rasi naan reko. Onaim namnaub kit he hit arkit anbi oras ta’koro’ te, hit kais ta’koro’ ruum-ruum aah. Hit ta’koro’ mes tamnau Uisneno. Uisneno npaek kit anbi In a’niman he tatoon teu pah-pinan ia, mtak, Uisneno nmoni nbi Yesus Kristus hit Usi’. Oras ia hit tamnau In nenon re’ napein ha’mu’it ma ma’ne’at.

Karu on naan, maut nai he hit arkit tamnau Goe nbi onen ma boifanu piut-piut he menas ma ha’mu’it ia, In es re’ neikn On na’roob ee na’ko hit sonak ma hit atnanak. Ahinit ma amanoet ein n’etun ma natoon neu kit nak, ta’koro’ te naan anjair meup reok goes re’ neik tfeka’ re’ nafeek nain in rais noman naan neu kit he kais antoom kit, ma hit ka tjair fa turu-nete karu hit aok ii napein menas naan.

Iim arkit neno ia, noka’ ma nmeu, kais a’tpoi fe’ ta’ko bare ‘koro ma tanini re’ ia. Mes tamnau Uisneno piut-piut on re’ nai’ Petrus ma in partei ngguin. Maut he Uisneno es re’ neikn On anhasu’ pah-pinan ia, he menas naan naen na’roo. 

On re’ naan, tua.