Dinding Hati

Hit bisa tahiin rais manekat re’ batuur ta’ko Kristus In a’tope. Fin In es re’ anneek kit tar antea In nnona’ Inn tuan ee he nmaet, ansenu’ ma nseka’ kit. Es naan ate, hit ro he tnona’ hit tuak ii teu hit aok-bian sin (1 Yoh.3:16)

Kotong bisa kanal sayang yang batul dari Kristus pung conto. Te Dia sayang sang kotong, sampe Dia sarakan Dia pung diri deng mati, ko ganti sang kotong. Tagal itu, kotong ju musti sadia sarakan kotong pung idop kasi sang kotong pung sodara dong (1 Yoh 3:16)

Basodara sayang dong. Ini pagi sedang buat apa di ruma ko? Samua orang masi di ruma sa ko? Masi karja dari ruma, balajar dari ruma, deng ibada di ruma. Na, orang tani ko yang urus piara hewan dong karmana mau karja dari ruma. Musti kaluar dari ruma, sonde mungkin sapi ko babi botong kirim makan deng onlain. Kalo jagong su sampe dia pung waktu ko pata, karmana botong dudu di ruma trus beli paket data ais cari jaringan, foto itu jagong di kabon, nanti jagong maso pi loteng.

Ada lai, kalo orang mau ame aer sa. Ini di desa orang masi pi pikol aer. Balom samua kampong ada leding sampe dalam ruma. Orang musti pi ame aer. Na, kalo dia pi ame aer, pake masker. Waktu dia pulang, balom bole maso ruma. Musti cuci tangan pake sabun, rendam pakian, mandi dolo. Na, ini karmana? Orang pi ame aer ko minum? Dia bawa sampe ruma trus pake ko cuci tangan deng cuci pakean deng mandi. Trus minum? Sonde cukup.

Neu, jadi orang di kampong mesti bijak. Jang pokorol bekin iko atoran yang pemerenta kasi buta-buta sa. Beta lia-lia sama ke taro jargen di muka ruma dong. Itu jargen yang ada aer tu, sonde ada yang pi sonto. Kenapa? Aer ada di situ untuk pamer kasitau petugas dong, kata bilang, su iko atoran pemerenta. Ini botong pung hati karmana? Jujur buta-buta sa.

Basodara sayang dong. Ini pagi ada satu ayat alkitab yang Yohanis tulis. Dia omong so’al basayang. Kristus jadi conto. Batul. Kristus jadi conto. Banya conto yang kotong bisa lia deng iko dari Yesus. Dia ju ta’at di pemerenta. Lia sa, pemerenta yang waktu itu ada di Yudea yang jadi gubernor itu Pilatus. Yesus ta’at. Dia badiri babae ko iko Pilatus pung mau. Yesus sonde manyao dia pung tanya, ma Yesus ada di situ. Dia iko sonde pura-pura. Dia sarakan diri ko pemerenta deng dia pung ana bua dong ator. Memang yang kotong balajar, dong ator iko atoran yang dong pake ko hukum orang jahat. Jadi rasa ke adil, seimbang.

Na, kotong balajar yang begitu; sakarang. Karmana kotong di kampong sayang diri? Ini sakarang ada virus nama korona. Dia sikat orang-orang di mana-mana ko pada mati. Lebe banya yang su tua dong. Jadi pemerenta buat atoran yang bilang cuci tangan pake sabun deng aer yang malela. Cuci tangan ju inga ada dia pung atoran. Jadi kalo mau salamat mesti iko itu atoran.

Masala datang di kampong yang susa aer. Kemaren-kemaren mau minum cari aer susa. Sakarang mau cuci tangan, cuci pakean, mandi di ruma; ini dong karmana?

Mari sayang diri, sayang keluarga. Jang karas hati. Pi mandi di tampa yang ada aer. Biar jao ju bae. Jang karas hati sama ke dinding tabal. Sayang basodara dong di kampong na yang di kota jang pulang te, di kampong ada susa aer. Sonde ada leding di ruma-ruma keluarga dong. Musti pi cari aer baru bisa mandi, cuci deng bawa pulang ko minum.

Basodara sayang dong. Mari sayang kaluarga deng jaga jarak. Itu bukan hati sedang tabal sama ke dinding.  Bagitu sa. Tuhan Yesus sayang ee… . Botong ju sayang satu deng laen ee…

 

Yang coret: Roni Bani