Mreku ‘Sene, Mait Siit ma Si’i, Mibsoo’ nai meu Uisneno

Mreku ‘Sene, Mait Siit ma Si’i, Mibsoo’ nai meu Uisneno

Keluaran (Anpoin na’ko pah Masir) 15:1-21

 

Haan unu-eno’-‘to’i ma mapua’ (pengantar)

 

Neno ia hit tataamb ok atbi kruei no nuan ii nbi fuun Nima’. Anbi GMIT hit tahiin tak, fuun Nima’ naan, anjair tabu ma oras he arkit tamnau atoran harat haran pah ma nekaf, tamnau uab ma a’an re’ Uisneno nnona ma nfee sin neu kit pukan ma nonot GMIT kit arkit. Hit tabua ma tabees teu Uisneno, ttae In nonin re’ anmatoom nok harat haran pah ma nekaf, uab ma a’an. Krei akoont ii, hi arki mneen reta’ nak, Uisneno nbatis mansian ii sin uab. Uab mese’, hanaf mese’, njair uab amfaun ma hanaf amfaun. Rarit sin nsisa’en na’kon pah Sinear natuin rasi naan. Sin pukan es ate nmu’in kuuk sin uab, onaim pukan es ka nahiin fa pukan es in uab.

 

Neno ia, hit tsoi’ ma trees Suur Akniun’ ii in afan, re’ nruun ma ntui, nareta’ ma natoon kit nak, nai’ Musa nait siit ma si’i, nsii ma nabsoo’ he ntuna’ ma na’ratan Uisneno. Nai’ Musa ka nmees’ fa, mes in nok too ma pah Isra’el nomees’-mese’. In fetof bi Miriam nait a‘reku’ huum es, re’ anteek ee nak, rebana. In nreuk, nsii ma nabsoo’ nok bifee ngguin amsa’.

 

On naan ate, GMIT anfee uab unu-haan unu neu reta’ neno ia mnak, “Mreku ‘Sene, Mait Siit Ma Si’i, Ma Mibsoo’ Nai Meu Uisneno.”

Nahuun na’ko au ukonob reta’ noka’ ia, maut he hit tkius siit ma bso’ot.

 

Noni’ na’ko resat (pelajaran dari bacaan/teks; tela’ah teks)

 

Aok-bian manekat anbi Yesus Kristus. Karu hit troim he tatoit ma tataan, neu saa’ am es nai’ Musa nait siit ma nsii nok too Isra’el? Si nsiin nrarin on naan ate, bi Miriam nok bifee ngguin naitin a’reuk rebana, anrekun, nsiin ma nabso’on amsa’. Neu saa’?

 

Attae tarek-reko surat Anpoin na’kon pah Masir ‘bata’ 14. Rasi naan anjari ‘sukif ma asfanu’ arekot es. Sin na’suki’ siit ma bso’ot he npures ma nanaib Uisneno, natuin In mepu ma re’ot re’ njari nbi sin humak ma sin matak. Mepu naan naruru’ ma nakrira’ In kuasan. Fir’aun nok in soraurs ein ka nabe’in fa he nhaken nbin Uisneno In human ma In matan. Uisneno nsapar nataam sin neun oe tais’ ee nanan, oe tasi’ naan anmemun naneuk sin. Rasi naan anjari nbi too Isra’el sin humak ma sin matak.

 

Iim arkit attae rasi ‘sukif re’ nai’ Musa na’uab ma n’aa’ sin anbi siit naan.In nareta’ saa’?

  1. Era’ mese’ ntea era’ faun (15:1-8)
  • Nai’ Musa nak, arekot karu au ‘ait siit ma si’i he ‘sii ‘pures ma ‘bo’is Uisneno. In n’etu ma natoon neu too Isra’el re’ in nmanu’naak sin naan. In na’naak, in nait siit ma nsii nahuun.
  • Nai’ Musa nareta’ nak, Uisneno naan anjair ma’tanif es ma siit pures-bo’is es. In njair rais fetin neu na. In njair Uisneno re’ in amahoint ii msa’ na’ruri’ ma na’bees neu Na. Es naan ate, nai’ Musa msa’ nmoe’ natuin ma ntao neek amneot ma amnonot he natuin Uisneno.
  • Nai’ Musa nareta’ nak, Uisneno naan meo pae’ jes anbi makenat. In kanan re’ mateka’ ma’boto’ es re’ Usif. Usif Fir’aun in akreet ein, Uisneno nait inporin sin. Uisneno narema’ Fir’aun in meo pae’ ne neun tasi Tiberau. Tais ainaf anmemun naneuk sin. Sin nmofun ntaman neun oe tasi’ nahuum on re’ tamofut fatu neu nifu. Uisneno In a’niman a’ne’u mapina’ ma makraha’, natuin anmui’ kuasa. Es naan ate, ‘nimaf naan bisa ntee’ ma ntuut nakrati’ musu. Nai’ Musa nareta nkoon nak, Uisneno In nekan arekot re’ namneo ma namnoon re’ naan, nait ma npekes nakrati’ seka-kau goah re’ nait in a’niman ma npaas in a’basan he nraban Uisneno. Uisneno bisa npiin ma nakraah nbi In to’os. In bisa nout nakrati’ sin nahuum on re’ atoni’ notu ‘puat. Karu Uisneno nheer ma napoin In a’snasan, naan nahuum on re’ ain nautus re’ bisa nfuu okin ma nahake’ naneo oe ‘saif, n’eek na’etib oe naan ma ka nsai fa on re’ nbi nifu ma tais ana’, ma naritab noe sako nbi tais je tnanan.
  1. Era’ 9

Nai’ Musa na’uab haan fare’. In na’uab anpaek muusn ein sin uab. Muusn ein na’uab ein nak, In he nriu’, napein sin, nbakat naan sin a’muik ein, rarit anboo’ ma nbait sin. Muusn ein nmu’in tenab nak, sin maneunk ein ma ma’taink ein ro he ntea bare, es re’ he nareu’ ma ntuut nakrati’, ai’ nroor niis atoin’ Ibranis sin. Sin he naitin suni’ ma nous suni’ he nroron atoni’.

  1. Era’ 10-19

Era’ re’ ein ia, natoon Uisneno In ma’tanin. Uisneno npaek ain nautus. Uisneno nneis nain are’ kanan usif ma pah ii tuan. Uisneno naan natiip, na’ait, natuuk ma napoo’. In na’kii’ naher-heer npaek In manekan. In nneek niis In na re’ In nsoi nafetin naan sin.

Uuf ma pah bian namtaun ma nasmanan. Filistin, Edom, Kana’an.

  1. Era’ 19-21

Era’ re’ ein ia, natoon nak, mafefa’ kninu’ bi Miriam nait ‘reku huum es, re’ anteek ee nak, rebana. In nhaek maat, rarit bifee ngguin natuin ee. Sin naitin siit, nrekun ma nabso’on.

 

Noni’ neu kit (Pelajaran untuk kita)

 

  1. Nai’ Musa ma bi Miriam naan, a’nakat anbi pukan ma too Isra’el oras naan. Sin nua sin nhaken maat he nfeen a’tope’. ‘Tope’ huma’ mee? ‘Tope’ re’ sin nmoe’ je gui es re’: naitin siit ma si’i, sin nsiin he npures ma nbo’is Uisneno. Sin ntuuna’ ma na’ratan, naikas ma nanaib Uisneno. Rarit uuf-uuf re’ sin nmanu’naak sin, nmo’en natuin nai’ Musa ma bi Miriam.

Rasi ia nanoni’ kit nak, karu mhaek maat mbi too srani’ ai’ pukan akninu’, ro he mfee ‘tope’ mbi uab ma a’an; mfee ‘tope’ mbi mo’et ma taos; ma mfee ‘tope’ mbi mneikin.

Karu mu’naak, mutenab mufan-fain’ mak, he mu’uab amfee penit saa’ es, maut he kais atoni’ n’oet (n’oat) ko. Ai’ karu n’oet (n’oat) ko te, maut he nfee ko raan a’po’i. Ma tuaf re’ nroim he n’oet (n’oat) penit na’ko a’nakat, maut he in nfee raan a’po’i te reko nneis na’ko a’nakat.

Karu mu’naak, mutenab mufan-fain’ mak, he mait mepu-re’ot es, muresi’ ma mutaib ee rek-reko, maut he kais atoni’ nakre’et ma nfare’ ko. Ai’ karu nakre’et ma nfare’ ko te, maut he mfee ne mepu he in nhaek maat njair a’haba’ re’ naruru’ ma nakrira’ raan a’po’i.

  1. Too Isra’el ai’ atoin’ Ibaranis sin, too piri’-too beti’ na’ko Uisneno. Uisneno nait sin njarin In aan neek ein na. Mes sin on re’ bijae moko re’ neon ee ntook goah. Karu he tteib in a’nakan, apii reko ma aheer reko te na’ nabei’ je. Too Isra’el naan, neot es-neot es sin bisa nnenan ma natniin nai’ Musa. Mes neot es-neot es sin nasurin nok nai’ Musa. Maski sin nitan kuuk neik sin matak fuak ein anmatoom nok mo’et ma taos arekot na’ko Uisneno, mes sin bisa naikoit rasi naan, ma natuin sin roimk ein kuuk.

Nai’ Musa nfee ‘tope’ nbi siit ma si’i; bi Miriam nfee ‘tope’ nbi ‘reuk rebana ma bso’ot. Sin nmoe’ natuin ein on re’ naan.

Karu on naan ate, pukan akninu’ kit arkit. Uisneno nsoi nafetin anrair kit. In nsaok ho sanat ma penu sin, In nnoes hi rahi oematan re’ n’oemetab ma na’koto’ In manekan.

Onaim, arekot karu hit tsii he tbo’is In manekan, tabsoo’ he taprira’ ma tsiir In Tuan et sonaf tetus abar-barat.

Au ‘pirsai, In es re’ antao harat haran pah ma nekaf neu ahuunt ein nbin pah meto’ (P.Timor) re’ ia. In es re’ antao Uab meto’ neu kit nok nain in risan arekot. Risan es, es re’ a’asramat. Abitan Helong nteek ee nak, Basan. Abitan Sonba’i-Banam-Oenam nteek ee nak, Natoni. Abitan Biinmafo (Biboki, Insana, Miamafo) nteek ee nak, Takanab. Risan uab re’ ia arekot karu tpaek je he ta’naeb Uisneno.

 

Haan muni-a‘seni’ (penutup)

Pukan akninu’ anbi Yesus Kristus. Maut nai he hi mtebi mfain nai. Miresi’ ma mitaib. Mitoti ma mitaan; karu ho mmees’-mese te, ho mkore’  ma mteek Uisneno ai’ kah? Karu ho mok ho uim je nanan, misaeb sukur neot es, hi mreku ‘sene ma mibsoo’ he njair tanar neu rais sukur ai’ mmo’e bso’ot naan anjair rasi re’ he mitoko’ mahonit ma ana’prenat?

 

Mait siit ma si’i. Mait a’reku’ ma mreuk nai. Mait bano ma ‘sene he mibsoo’ nai.

Au ‘tebes a’bi au nekak, Uisneno es re’ antao ma nfee hinef, ronef ma manoef neu ahuunt ein, ma hit arkit amunit neno ia, ma amunit amneemt ein neon amunit.

Tebes namneo, tua. Amin

 

Penulis : Pnt. Heronimus Bani