Tuhan bekin sembu

TUHAN membantu dia di ranjangnya waktu sakit; di tempat tidurnya Kaupulihkannya sama sekali dari sakitnya (Maz.41:4)

 

Tuhan bekin sembu

Mazmur 41:1-14

Sodara sayang dong. Satu kali beta sakit cukup berat. Trus beta pung sodara dong bawa pi ruma sakit di Kupang. Sampe di ruma sakit, petugas dong pariksa sana-sini. Trus bilang, musti tes dara di laboratorium. Neu tagal beta sakit jadi beta iko sa, ko sapa yang sakit ko sonde mau sembu. Jadi dong mau ator karmana, ator pi, asal beta sembu. Jadi, dong ame dara satu tetes ko bawa pi laboratorium. Tunggu. Na, tagal keliatan beta lumayan sakit berat, jadi orang pariksa dara di laboratorium dong sonde lama ju su bale datang. Sekitar satu jam begitu. Dia pung hasil negatif. Sonde ada panyaki. Aneh. Beta sadiki kecewa te, ini sakit su mau lewat ma petugas laboratorium bawa hasil bilang, negatif. Trus dong kasi saran, “bu pulang ko istirahat sa.” Beta mara, karmana ni, ini beta sakit berat, bosong suru pulang ko istirahat sa. Beta sadiki maruak di petugas ruma sakit, ma parcuma. Dong katawa sa, suru pulang ko istirahat. Sampe di rumah botong ator ko do’a. Inga ko makan, minum deng bae, telan obat dari ruma sakit. Trus pi cari orang ko datang bantu. Dia minta ko botong do’a, ais itu dia bantu kasi obat ko kalo bole beta sembu. Na, batuul ju. Tuhan ator sama peersis ke yang ada tulis di Lagu Puji Dong (Mazmur) 41:4. TUHAN membantu dia di ranjangnya waktu sakit; di tempat tidurnya Kaupulihkannya sama sekali dari sakitnya.

Puji Tuhan, beta ahirnya sembu. Beta bangun ko makan, minum, bisa duduk. Orang datang kasi undangan pi pesta wisuda, beta katawa sa. Ini baru sembu, mau langsung pi karmana? Beta bilang, makasi su datang undang, ma, tolong kasi tau yang punya pesta wisuda, beta baru turun dari tampa tidor, badan noe-noe ma su bisa bagarak. 

Jadi, memang Tuhan su ator ko kalo ada yang sakit, ada yang pi bantu deng do’a, ada yang urus kasi minya di badan, ada yang pariksa bagian dalam badan tagal dong dapa sakola kusus ko bisa pariksa bagitu, ada yang kasi nasehat. Orang sakit tu, dia pung teman banya. Kao dengar sakit, ko kalo sonde sempat pi liat, mungkin mau kirim do’a sa. Waktu sakit kotong perlu do’a, ma do’a jang panjang lalolak sama ke bekin cerita basambung kasi Tuhan. Tuhan pasi kasi sembu. Tinggal botong bilang, “Tuhan, bantu yang loyo badan ini ko bisa kuat, tagal Tuhan yang pung kuasa ko usir panyakit.” Do’a pendek-pendek sa, sederhana sa? Jadi botong sonde repot pili kata yang bekin rasa bagus di talinga. Tuhan bukan minta kata-kata manis ko inda.

Parcaya dalam nama Yesus, pasti sembu. Jang paksa Tuhan kalo ada sakit na mau minta cepat-cepat sembu. Biar ko Tuhan yang ator, botong iko Dia pung mau sa. Begitu su. Amin

 

Penulis: Pnt. Heronimus Bani
Sumber: SnaK, Surat na’ko abitan Koro’oto