Are’ saa’ ii nanaib ma na’naeb Uisneno

Are’ saa’ ii nanaib ma na’naeb Uisneno

Mazmur 93

Aok-bian manekat anbi Yesus Kristus hit Usi’. Hit arkit tahiin namnees tak, re’ bisa nasaeb siit pures-bo’is neu Uisneno es ahaa mansian. Are’ kanan hau-fatu, nai ma afu, oe, noe, nefo ma tasi, knete’, ‘to’ef ai’ neno, manas, funan ma kfuun, sin ka nmu’in fa fefaf henati’ nfiik sin he na’naeb Uisneno nekin siit pures-bo’is. Are’ kanan mu’it maski sin nmu’in fefaf amsa’, fefaf naan sin npaek sin he naah am ninun he npanat sin a’moink ein he nmonin piut. Sin ka nsiin fa, ka neikin fa fua-‘turu’ he ma fua-tnatas. Hit arkit tahiin namnees on re’ naan, tua.

Mes surat re’ hit trees ma tso’i, Siit Pures-Bo’is (Mazmur 93) an’etu ma natoon neu kit nak, are’ kanan noe ma okin ntuna’ ma na’ratan Uisneno. Hit tahiin ta’ko mee tak, sin arsin re’ naan nmo’en on re’ naan? Ro tebes, mansian ii es re’ he ntuna’ ma na’ratan Uisneno. Onaim, hit tanoni’ on nai: karu noe jes nasai, hit tiit in a’sain ee karu kninu’ te, are’ kanan ika’, kmoru’, poes nmonin nbin naan nok reko. Mansian ii niit sin on naan ate, anmarinan. Oras in nmariin ro in he namnau mahoet na’ko Uisneo neu mansian naneet natuin noe naan. Karu mansian ii nareu’ noe naan in a’sain, henate in he nteek nak, noen aa arekot on mee? Mes karu in npaek noe naan in a’sain ee he nore, nseen are’ kanan roet arekot, mnahat he nhao ma nfait in tuan, in uim jes in nanan, ma too nbi kuan es in nanan, nok ranan naan Uisneno In kanan ro ma’boto’ ma ma’boni’. Karu on naan ate, hi ttuna’ ma ta’ratan Uisneno.

Aok-bian manekat anbi Yesus. Karu hit tiit oikn ein anpesan antean tais je ninin, hit tmariin atmaet. Oikn ein anmari’-ri’un on re’ he nmakpein-pein ein een. Hit ka tfee fa rais pures-bo’is teu oikn ein naan, mes hit ro he tfee pures-bo’is teu Uisneno, natiui In es re’ anmoe’ oikn ein naan nahuum on re’ anmari’-ri’un. Anneis-neisi ntein karu hit ttae tais je in nanan, karu naheun nok ika’, hit neek ii nmariin. Hit huumk ii namteut ma nkumain natuin iik’ ein anbin tais je nanan. Hit tapein mainuan he ttaun ika’, tkiif kai ika’ tapaek ranan huma’-huma’ mes kais atraos sin, kais atpaek bom he ta’maet sin no mese’ nain. Nok ranan naan, karu tais je maraso’ te, iik’ ein ka nmonin fa gwen. Onaim sekau kaan es es re’ amre’ut? Mansian!

Uisneno nneek kit. In ntuun On et bare re’ hit ka tiit taan ee fa. In nfee kit a’be’if ma ma’tanif na’ko sonaf neno tunan, In baran. Hit tpaek ‘be’if ma ma’tanif naan he tmeup meup arekot he tapein afan ma nesan arekot amsa’. Rarit hit tanaib, ttuna’ ma ta’ratan Uisneno kuun re’ anfee kit are’ saa’-saa’ he hit tmoin. Onaim, nok ranan naan hit arkit tok pah-pinan ia in afan nesan attuna’ ma ta’ratan Uisneno. Amin. On re’ naan, tua.

 

Atuis: Pnt. Heronimus Bani
Sumber: SnaK, Surat na’ko abitan Koro’oto