Uisneno nnoon ma nteun kau

Puisi berikut ini berdasarkan kitab Yermia 1:5

Koi Uisneno,
Ho ka mnoon ma mteun maan kau fa fe’, tua
Au aina’ ka na’apu’ ma nahoni’ kau fa fe’, tua
Au kuuk ka ‘poi ma ‘boor ‘aan fa fe, tua
Au aina’ ka nasuus ma nhao naan kau fa fe’, tua
Au kuuk ka u’nae he ‘neek amnais ‘aan fa fe’, tua
Ho msaok ma mukninu’ mrair kau, tua
Ho mruur ma mreek amrair kau, tua
Ho mruuk ma m’ukur amrair kau, tua
Ho mteek ma mboni mrair kau, tua
Ho mteet ma mufeek amrair atfeka’, tua
Ho musanut ma munebet Kabin akninu’, tua
Ho mupohot ma muna’at Kabin akninu’, tua
Ho mu’ni’ib ma mu’ki’ib Kabin akninu’, tua
Ho mutuab ma muberab Kabin akninu’, tua
Ka meu tua sona’, buti’ ai’ bute
mes…
meu kau, tua
meu Ho anah kau, tua

Maut he au ‘jair Ho anah ma ate
Maut he au ‘jair Ho aan renu’-aan reka’
Maut he au ‘eik ma ututa’ Ho Kabin ma Prenat
Maut he koro-manu, nunuh ma rete, ‘nisu mnanu’ niin mainuan
Anneen ma natninan
Ansium ma ntoupun
He nateut pah ma nifu kninu’
He namnau oe-maat akninu’
He ntoofn ok nbin hau ‘honis akninu’
He na’ruri’ ma na’besan neu Ko, tua.

Penulis: Heronimus Bani